Z kolesomaj na Trabanće je Andreas Clauß po cyłej NDR na prěnje wubědźowanja triatlona jězdźił.
W zwisku z běhanskimi wurisanjemi wosebje w Biskopicach, kaž běchu to na přikład kóždolětne běhi po dołhich distancach, nazymske běhi po Butrowej horje a kombinowane běhi z tójšto zadźěwkami „Schiebock läuft Extrem“, sym so někotre razy z jich wurjadnym moderatorom Andreasom Claußom rozmołwjał. Wědźach, zo je so wón w poslednich lětach wobstaća Němskeje demokratiskeje republiki (NDR), jako započachu so wubědźowanja triatlona, z nowej sportowej družinu zaběrał a zo bě hišće 1990 w swojej klasy A3 posledni mišter NDR w triatlonje.
Prěnje wurisanje
W lěće 1984 organizowachu w Lipsku prěni „wutrajnostny třibój“, štož běše faktisce prěnje triatlonowe wurisanje w NDR. Wěm, zo je so tehdy tež z Budyšina nan našeho pozdźišeho Budyskeho jara wuspěšneho profijoweho triatlonista Maika Petzolda, Reinhard Petzold, z přećelemi z wokrjesa wobdźělił, štož njejsu oficialnje rady widźeli.