Wot spočatka awgusta maja w Radworskim serbskim eksperiMINT campusu noweho projektoweho sobudźěłaćerja: Raima Stirnera. Milan Pawlik je so z 48lětnym Budyšanom, kotryž je w Nowych Boranecach wotrostł, rozmołwjał.

Što je Was pohnuło, so w serbskim eksperiMINT campusu požadać?

R. Stirner: Jako nan dweju dźěsći wěm, kak spomóžny a wažny tajki kubłanski a rěčny projekt kaž Radworski eksperiMINT campus je. Nimo toho sym za zmysłapołnym dźěłowym městnom pytał – za městnom, na kotrymž móžu na dobro zhromadnosće, na dobro towaršnosće skutkować. Na poskitk je mje Budyska znata skedźbniła. Jako sej online-wupisanje potom přečitach, běch přeswědčeny, zo so derje ke mni hodźi. Hladajo na serbšćinu je to za mnje wosobinski eksperiment. Sym serbsku šulu w Radworju a Serbski gymnazij w Budyšinje wopytał, doma pak smy němsce rěčeli. Po wjele lětach přebytka w němskorěčnej wokolinje so do serbskorěčneho swěta nawróću a swoje znajomosće serbšćiny takrjec reaktiwěruju.

Što słuša k Wašim nadawkam na nowym městnje?