Hłowne ćežišćo přichodneho wusyłanja telewizijneho magacina Wuhladko je nowe zrěčenje wo financowanju Załožby za serbski lud, kotrež su zwjazkowy minister Horst Seehofer (CSU) a ministerskaj prezidentaj Sakskeje Michael Kretschmer (CDU) a Braniborskeje Dietmar Woidke (SPD) 20. julija we wobłuku widejoweje konferency podpisali.
Z dalšim přinoškom wěnuja so přihotam na premjeru serbskeje pop-opery „Carpe noctem – Njeskónčna nóc“. Projekt kolektiwa „Trio a Kumple“ a towarstwa Pawk změje 10. septembra premjeru. Stawizniski wobłuk magacina pod hesłom „Kolektiwizacija & Serbja: 60 lět ‚Socialistiske nalěćo‘ w ratarstwje“ wobswětla, kak je so prestižny projekt NDR, wutworić ratarske wulkozawody, na burske swójby we Łužicy wuskutkował. Nimo toho posrědkuja nowinki z Tienšana resp. Pamira, hdźež je so ekspedicija wokoło Eliasa Bětki mjez druhim na 7 134 metrow wysoki Pik Lenin zwažiła.
Telewizija MDR wusyła Wuhladko jutře, sobotu, w 11.45 hodź. Wospjetowani slědujetej póndźelu, 9. awgusta, w 6.10 hodź. w MDR a sobotu, 14. awgusta, w 13.30 hodź. w telewiziji RBB.
Najwobšěrniši přinošk přichodneho wusyłanja telewizijneho magacina Wuhladko wěnuje so njedawno wotmětej 20. hłownej a wólbnej zhromadźiznje Domowiny w Slepom. Dalši wažny podawk, kotryž telewiznicy wobswětleja, je jubilej před sto lětami nowozałoženeho Drježdźansko-Mišnjanskeho biskopstwa. Tež stawizniski wobłuk magacina zaběra so z róčnicu. Fachowcy rozjimaja, kak je so twar Berlinskeje murje před 60 lětami na wobydlerjow NDR, hospodarstwo kraja a nic naposledk na Serbow wuskutkował. Nimo toho poda so filmowe mustwo na pućowanje podłu noweje šćežki Ćišinskeho w Pančicach-Kukowje. Trochu zdalenišo a předewšěm wyše po puću je tuchwilu Elias Bětka w Pamirskich wjelhorinach. Wuhladko je so pola njeho wo stawje naročneje wuprawy wobhoniło.
Telewizija MDR wusyła Wuhladko jutře w 11.45 hodź. Wospjetowanje na samsnym sćelaku slěduje póndźelu, 5. julija, w 6.10 hodź. W telewiziji RBB pokazaja magacin sobotu, 10. julija w 13.30 hodź.
Wot junija prezentuje so serbski telewizijny magacin Wuhladko w nowym šaće, mjenujcy z wjetšimi płoninami za wulke wobrazy a panoramy, kotrež mnohostronskosć serbskeho žiwjenja hišće lěpje pokazuja. Po wjacorych lětach w znatym designje bě nětko načasu, nowe puće kročić. Wšako so tež wašnje, kak přihladowarjo a přihladowarki telewizijny program sćěhuja, stajnje měnja. Wo tym přeswědčić móža so zajimcy jutře, sobotu, w 11.45 hodź. na sćelaku MDR. Mjez druhim rozprawjeja tam wo rozpušćenju Sakskeho wukubłanskeho a wupruwowanskeho kanala SAEK. Jeho Budyska wotnožka je jara wjele pioněrskeho dźěła na polu serbskeje rěče w elektroniskich medijach wukonjała. Nětko so prašeja, kak z tym dale póńdźe.
We Wuhladku zaběraja so tež ze stolětnymi stawiznami Drježdźansko-Mišnjanskeje diecezy, kotruž bě bamž Benedikt XV. lěta 1921 znowa załožił, po tym zo bě něhdyše biskopstwo Mišno za čas reformacije zašło. Nimo toho předstaja dwurěčnu zawodowu nowinu, kotruž su njedawno w zawodźe TDDK w Nadróžnej Hrabowce wudali.
Ćežišćo přichodneho telewizijneho magacina „Łužyca“ je reportaža wo wozrodźenju serbskich pomjenowanjow w Strjažowje. Christian Matthée je sej tamniše statoki wobhladał a so jich wobydlerjow woprašał, hač a čehodla su so z akciju – snano – na přikładźe Dešnjanskich susodow orientowali.
Nimo toho rozhladowachu so telewiznicy w Choćebuskej Witaj-pěstowarni „Villa Kunterbunt“ a jutře rozprawjeja, kak w dźěćacym dnjowym přebywanišću tuchwilne wužadanja zmištruja.
Slědowacy přinošk pedagogisku temu tohorunja wobswětla. W srjedźišću steji prašenje, kak móhł kraj Braniborska serbskorěčne wukubłanje podpěrować.
Wědomosć a historiske hospodarstwo so w přichodnym wudaću „Łužycy“ hnydom dwójce jewitej. We wobłuku „Namakanki“ zarjaduja a posudźuja fachowcy stare pjenjezy, kotrež buchu z archeologiskimi slědźenjemi wědomostnikow kaž tež lajkow w regionje wotkryte. K tomu hodźi so rozprawa wo nowych dopóznaćach nastupajo „wikowanske drohi starych Słowjanow“.
Wobšěrnje wěnuje so přichodne wusyłanje telewizijneho magacina Wuhladko předsydźe Domowiny Dawidej Statnikej, kiž je njedawno zdźělił, znowa za zastojnstwo kandidować. Portret chce pokazać, kotre nadawki ma předsyda wukonjeć a kak jeho wšědny dźeń na čole třěšneho zwjazka Serbow wupada.
Dalši přinošk zaběra so ze stawizniskej temu. W lěće 1972 wujednaštej NDR a ZRN tak mjenowane transitne zrěčenje, zmóžnjace wobydlerjam zapadneje Němskeje, wopytać swojich přiwuznych na wuchodźe. Wuhladko přepytuje wuskutki toho na Łužicu. Tež reportaža „Serbscy šrubowarjo a jich drohoćinki-oldtimery“ ma historiski pozadk a zwisk k NDR. Wona wobswětla, kak entuziasća we wólnym času stare jězdźidła rekonstruuja a hladaja. Najwjetšu fascinaciju wuprudźeja za nich jězdźidła z dwutaktowym motorom, kaž na přikład Barkas. Clemens Šmit je so wo tymle wosebitym, častodosć drohim hobbyju wobhonił.
Delnjoserbski magacin Łužyca wusyła telewizijny sćelak RBB jutře, 20. februara, po zwučenym wašnju w 13.35 hodź. Ćežišćo tónraz budźe wjerch Hermann hrabja Pückler-Mužakowski. Składnostnje jeho 150. posmjertnin wěnuje so reportaža prašenju za poćahom mjez Pücklerom a Serbami. W rubrice „Namakanka“ přepytuja k tomu markantne, často pyramidu mjenowane rownišćo Pücklera. Je tónle tumulus wuraz gigantomanije abo naposledk snano tola šibałosće wjercha?
Dalši přinošk předstaji staršisku iniciatiwu Serbskeho swójbneho towarstwa „Gromaźe“. Franziska Albertowa, kotraž bě projekt sobu nastorčiła, organizuje z pomocu Europskeje uniwersity Viadrina w Frankfurće nad Wódru digitalnu wučbu za zakładnych šulerjow. Łužyca jej při tym přez ramjo hlada.
Tohorunja wo kubłanje dźe w rozprawje „Korona a wučba serbšćiny“. Telewiznicy su so mjez wučerkami a wučerjemi wobhonili, kak je so pandemija na jich dźěło wuskutkowała a kak z nowej situaciju wobchadźeja.
Ćežišćo přichodneho telewizijneho magacina Wuhladko je jubilej załoženja Serbskeho šulskeho towarstwa, kotrež bu před 30 lětami z dźěłoweje skupiny Serbskeje narodneje zhromadźizny w Chrósćicach wutworjene. W přinošku wobswětleja najwažniše mězniki skutkowanja SŠT a portretuja wjelelětnu nawodnicu Ludmilu Budarjowu kaž tež jeje naslědnicu Katharinu Jurkowu, kotraž je nowe zastojnstwo kónc minjeneho měsaca nastupiła.