Mikswolejbulisća Budyskeje FSG su 30. mišterstwa na hobbyjowej runinje ze slěbrom mjez sydom startowacymi cyłkami zakónčili. Mustwo ST Wjazońca zaruči sej třeći raz zasobu titul wokrjesneho mištra.
Kaž SN hižo rozprawjachu, je Sakski wolejbulowy zwjazk coronawirusa dla we wšěch ligach dypkowe hry wotprajił a dočasnje zakónčił. Tak su tež mišterstwa mikswolejbulistow na hobbyjowej runinje w Budyskim wokrjesu nimo. Tróšku zbožownje skónči měšany team Budyskeje FSG jubilejnu 30. sezonu, wšako je mjez wšitkimi sydom mustwami najwjace partijow absolwowała. Ze šěsć dobyćemi wuwojowachu sej hrajerki a hrajerjo wokoło kapitana Petera Blümela slěborne městno. To je w 26. lěće přisłušnosće w miksowej lize jědnate wicemišterstwo. K tomu přińdu samsna ličba wokrjesnych titulow a tři třeće městna. Tak wostanje Budyska FSG dale najwuspěšniše měšane mustwo našeho wokrjesa.