„Da sym ja tón posledni“; ně, nochcu tu někajku nowu stawizničku po při­kładźe­ Bena Budarja napisać. A sym sej tež wěsty, zo njejsym posledni serbskorěčny wobydler w Nowej Wjesce. Ně, sym cyle jednorje posledni lětsa do tejele kolumny pisacy. Nětko pak tež wěm, kak ćežko to za mnohich mojich předchadnikow bě sej runje w tym padźe tematiku wuzwolić, kotraž ludźi tež zajimuje.

Posledni być we wšitkich móžnych situacijach njeje runjewon najrjeńše začuće. Zwotkel bjerješ motiwaciju za nowy pospyt, za nowe wubědźowanje? A sy-li stajnje posledni, ći tež sponsorojo z wulkimi pjenjezami njekiwaja, sy přěhračk w mnohim nastupanju. Kak pak by było, njebychu-li přichodnje jenož dobyćerja/dobyćerku mjenowali, ale tež poslednju/poslednjeho? Dźiwny to namjet, abo? Tola w sporće je wšitko móžno, startuješ-li jako jasny faworit. A hižo w prěnjej akciji móže so najlěpši z mustwa zranić.

Awtor dźensa

Ludwig Zahrodnik

Hody so bliža. Sportowcy, kotřiž su w minjenych měsacach ze stajnym treningom a hrami wužadani byli, wjesela so na zymsku přestawku. Zymscy sportowcy pak njemóža dočakać, zo móhli skónčnje na narodnych a mje­zynarodnych wubědźowanjach mo­cy měrić.

Takle bě to před 60 lětami: Sportowcy přihotowachu so na VII. olympiske hry, kotrež so w februaru 1956 w italskim Cortina d'Ampezzo wotměchu. Sportowcy NDR, kotřiž w cyłoněmskim mustwje startowachu, mějachu mało składnosćow, so do toho na mjezynarodnych wubědźowanjach wobdźělić. Tuž bě bronzowa medalja Harryja Glaßa w specialnym skakanju jenička za NDR.

W běhu lět je so to změniło. 1984 na Olympiskich zymskich hrach w Sarajewje wobsadźi mustwo NDR w hódnoćenju krajow samo prěnje městno. Dźensa wěmy, zo běchu wuspěchi sportowcow NDR tež nastupajo njedowolene substancy wažnu rólu hrali. A fenomen doping njeje přeco hišće přewinjeny.

Awtor dźensa

Mikławš Krawc

Tole je mój posledni přinošk za tutu kolumnu. Docpětych 45 lět dopisowanja je dobra składnosć, pjero młódšim awtoram přewostajić. Rady budu so dale na někotre wjerški dopominać: Započało bě so wšitko 1970. Wot awgusta komentowachu třo Budyšenjo – Józef­ Kilank, Pětr Šołta a ja – hry koparskeje wyšeje ligi NDR. Swój prěni artikl wotedach njedźelu, 13. awgusta, wječor w redakciji na Sukelnskej. Nowa doba započa w póndźelnišim wudaću aktualnje wo sportowych podawkach rozprawjeć. Do toho běchu tele wudaće mjenujcy hižo pjatk ćišćeli.

Awtor dźensa

Achim Kowar

Zymski sport nas skónčnje zaso ma. Šwedske město Östersund bě zašłej kóncaj tydźenja hosćićel biatlonowych sportowcow. Naši so tam wulkotnje prezentowachu: najprjedy bóle mužojo, po nich tež žony. W nordiskim sporće, to rěka w nordiskej kombinaciji a w skakanju w norwegskim Lillehammerje dyrbjachu naše worjoły tydźeń dlěje čakać. Nětko pak bě zazběh wjele lubjacy.