Dźesać mustwow na halowym koparskim turněrje wo pokal CDU we Worklecach so wobdźěliło
Róžeńčanske wjesne koparske mustwo je 26. halowy turněr wo pokal Worklečanskeje wjesneje skupiny CDU dobyło. To je so cyłkej wokoło kapitana Jurja Bjeńša (klečo srjedźa) třeći raz za sobu poradźiło. Tak wostanje koparski pokal na přeco w Róžeńće. Foto: Konstantin Hrjehor1991 bě zapósłanc Sakskeho krajneho sejma Alojs Mikławšk prěni raz šěsć koparskich mustwow do Worklečanskeje ćěłozwučowarnje witał, zo bychu tam wo pokal Worklečanskeje wjesneje skupiny CDU wojowali. Mjeztym wuwi so wurisanje k sobu najwoblubowanišim a po niwowje najlěpšim serbskim halowym turněram. Stajnje přeprosychu sej Worklečenjo tež nowe mustwa. Po lońšej přestawce přetwara sportoweje hale dla móžeše Alojs Mikławšk zašłu sobotu nětko dźesać cyłkow witać.
