Wjeršk za Serbsku koparsku wubranku žonow lětsa budźe wuprawa mustwa na turněr w Šwicarskej. Koparki chcedźa so we wobłuku přećelskich hrow mjez druhim z hosćićelskim teamom Retoromankow wubědźować.
Budyšin (SN/bn). Na přeprošenje retoromanskeho towarstwa Cultura ballape rumantsch (CBR) – koparska kultura Retoromanow – pojědu koparki serbskeje wubranki wot 4. do 8. julija na přećelske wubědźowanje Turn(ier)ada 2018 do šwicarskeho kantona Graubünden. Mužojo, kotřiž měli tam po přeću zarjadowarjow tohorunja sobu hrać, so časowych přičin dla – termin leži w dowolowym respektiwnje času treningowych lěhwow za sezonu 2018/2019 – wobdźělić njemóža. Tole zdźělištaj na naprašowanje rěčnik Serbskeho Sokoła Jan Hrjehor a referent Domowiny za kulturne naležnosće a wukraj Clemens Škoda.
