We Wojerecach wotmě so regionalne volleyballowe finale starobneje skupiny I pod hesłom „Młodźina trenuje za olympiju“. Holcy Serbskeho gymnazija Budyšin (SGB) podležachu w finalu Schillerowemu gymnazijej Budyšin z 0:2 a zaručichu sej slěbro. Hólcy pod­le­žachu gymnaziastam z Radeberga 1:2 wo bronzu a wobsadźichu na kóncu 4. městno.

Dokelž so w kónčinje Niska/Běła Woda pola holcow žane wokrjesne wurisanje njewotměwa, smědźachu so volleyballistki SGB jako druhe Budyskeho regiona na wuchodosakskim finalu wobdźělić. Šansu hrajerki wokoło kapitanki Kiry Hrjehorjec z přeswědčiwym wukonom wužichu a zakónčichu regionalne wubědźowanje ze slěbrom. Wone prezentowachu so jara wurunane a běchu přećiwo Powołanskošulskimaj centrumomaj Lubij a Kamjenc technisce lěpše. Tak roz­sudźichu prěnju partiju z 25:10 a 25:19 dosć jasnje za sebje, a přećiwo hrajerkam z Lessingoweho města běchu z 25:16 a 25:18 tohorunja wuspěšne.