Po wuspěšnej prěnjej połseriji a načolnej poziciji w regionalnej koparskej lize sewjerowuchod bě šeftrenar FC Energije Choćebuz Claus-Dieter Wollitz k zadźiwanju mnohich zastojnstwo złožił. Pječa njebě mjez nim a wjednistwom Energije hižo dosć dowěry. Z nowym trenarjom Sebastianom Abtom je so nětko za Serbske Nowiny Georg Zielonkowski rozmołwjał.
Hišće srjedź decembra sće nimale kategorisce wuzamknył, zo šeftrenarstwo FC Energije přewozmjeće. Zwotkel nadobo tajki přewrót?
S. Abt: Tehdy běše Claus-Dieter Wollitz hišće šeftrenar, tuž njebě to za mnje docyła tema na to myslić, so raz ze šeftrenarjom muži stać. Běch nazwučowar wubranki U 19, kotraž hraje w zwjazkowej koparskej lize, a mějach z njej dosć dźěła. Z „Pele“ Wollitzom sym so přeco wuměnjał, a to na zakładźe wuběrneho zhromadneho dźěła. To bě jara wažny čas za mnje, wažu sej jeho hač do dźensnišeho. Nadobo pak je wšo hinak přišło. Jako su mi zamołwići kluba dowěru darili, bě mi to wulka česć, a po krótkim času rozmyslowanja sym nowe wužadanje přiwzał.