Radworčanaj Ingo Adam a jeho zastupjer Nico Buša stejitaj dalše štyri lěta na čole Radworskeho sportoweho towarstwa. To je hłowna zhromadźizna minjeny pjatk rozsudźiła. Před nimaj a wšěmi druhimi 265 čłonami sportoweje jednotki leži napjate lěto. Před runje 100 lětami je so ST 1922 Radwor załožiło, štož chcedźa w běhu lěća wulce woswjećić. Na přikład hižo 2. julija z jubilejnej hru prěnjeho mustwa přećiwo BSG Chemiji Lipsk. Dalše wjerški budu spočatk awgusta koparski camp Dynama Drježdźany za dźěći, swjedźenski tydźeń spočatk septembra abo Běh na česć zbóžneho kapłana Alojsa Andrickeho 3. oktobra.
Sportnišćo a wosebje kompleks sportoweho doma „Při zelenej hałužce“ matej so lětsa tohorunja zdźěla wobšěrnje wobnowić. Za to su gmejnski zarjad a wulka ličba podpěraćelow wšu pomoc připrajili.