Awtor dźensa

Beno Šołta

Koparski derby w Chrósćicach a serbscy běharjo w Drježdźanach. To stej dwě móžnej sportowej nadpismje za dźensnišu kolumnu. Što dawa rjeńšeho za koparja, hač doma hrać na swójskej kermuši, a potom hišće derby měć přećiwo dalšemu serbskemu mustwu. To je so chowancam SJ Chrósćic II poradźiło. Tamniša koparska rezerwa je wčera swoje mocy měriła, a to přećiwo Radworčanam we wokrjesnej lize stafla II. Radworčenjo běchu w tabulce snadnje nad Chróšćanami, a w hrě to hnydom pokazachu. Po štwórć hodźinje steješe hižo 0:2 a kónčny wuslědk rěkaše 0:3 za hosći. To njeje najrjeńši dar ke kermuši. Tež prěnje mustwo Chróšćanow běžeše po tym na trawnik njedaloko šibjeńcy. Póst Germania Budyšin bě přećiwnik a rezultat po 90 mjeńšinach a přidawkom 2:3 – tež přěhrate.