Praha. W Praskim Serbskim seminarje dožiwichmy sobotu jedyn z tych dnjow, kiž móžemy jako dźiw hódnoćić. Cyły dźeń bě dom połny ludźi a planowany program wudospołnichu připadne abo krótkodobnje dorěčane poskitki. Rano wotstajichu na dworje seminara koparjo Sokoła Ralbicy/Hórki swoje awta, dokelž chcychu w Praze dobyće wokrjesneho mišterstwa wo­swjećić. Dźewjatnaće čłonow Ralbičanskeho teama starych knjezow bě lědma do njedalokeho hotela so přizjewić wotešło, to dóńdźe něhdyši předsyda Towarstwa přećelow Serbow, prof. Petr Kaleta, ze swojimi chowancami. Skupinje studentow stawiznow na Techniskej uniwersiće w Liberecu chcyše wón serbske zetkawanišćo pokazać. „Knjez profesor bě překwapjeny, kak smy so na jeho wopyt přihotowali. Zdobom skupinje to samsne poskićichmy, štož kóždy dóstanje: čaj, kofej, tykanc a přećelske słowo“, rjekny čłonka předsydstwa towarstwa Eliška Oberhelová.