Pjatk zahajichu w Chrósćicach nowu hrajnu dobu wokrjesneje wyšeje ligi. A to hnydom z horcym serbskim derbyjom. Dobyće 3:0 (0:0) swjećachu Sokoljo přećiwo Chróšćanam. Wrota třělichu Niklas Šnajder, Aleksander Wałda a Richard Šnajder. W samsnym času doby cyłk Póst Germanije Budyšin přećiwo zastupnistwu z Hornjeho kraja Sprjewja 4:2 (3:1). Dalšej wuslědkaj z tuteje stafle: Rakecy – Malešecy 2:2 (1:0) a Hory – Kulow 3:5 (2:1).

Tež we wyšej a krajnej lize honjachu zaso za bulom: Jednota Rudolstadt – Budissa Budyšin 0:0 a Drježdźanski SC je přećiwo FC Grimma 2:4 podležał. Pola DSC hraje aktualnje Hórčan Damian Jurk.

Wobaj koparskej cyłkaj Radworski a tež Njebjelčanski stej we wokrjesnej lize stafla dwaj z njerozsudnym wuslědkom 2:2 startowałoj. Hosćo z Radworja mějachu w Minakale trochu zboža. Najprjedy bě Marlon Wencel 1:0 (33.) třělił, po tym pak hosćićeljo hišće do přestawki hru na 2:1 (34., 42.) zwjertnychu, doniž Minakałčan na 2:2 (69.) ze samowrotami njewuruna. Njebjelčenjo nachwatachu doma zastatk 0:2 přećiwo hosćom z Łaza. Wrota za SJN třělištaj Jonas Krawčik a Florian Domš.