Konstantnosć hrajerjow Sokoła noweho trenarja přeswědčiła
Wot noweje hrajneje doby ma prěnje koparske mustwo Sokoła Ralbicy/Hórki noweho trenarja, Jiříja Krohmera z Budyšina. 39lětny Čech je znaty we Łužicy, wšako hraješe mjez druhimwjele lět w nadběhu pola Budissy Budyšin a w Kamjencu pola Jednoty. Jako šnórowaše kopački hišće za Sigmu Olomouc abo za letiske zastupnistwo FK Ventspils, wobdźěli so dohromady šěsć razow na UEFA-cupje, dźensnišej UEFA euroleague. Na swoju aktiwnu karjeru jako hrajer Krohmer potajkim hordźe zhladuje, nětko pak koncentruje so połnje na swój nadawk jako nazwučowar. Kopar Sokoła Jurij Bjeńš je hižo raz składnosć wužił a so ze swojim nowym trenarjom rozmołwjał.
Knježe Krohmero, kak je kontakt do Ralbic nastał?
26. crossowe běhi přewjedli
W Šěrachowje wubědźowachu so běharki a běharjo hižo 26. króć w tradicionalnym crossu. Sportowe towarstwo Běło-čerwjeni Šěrachow ze swojim předsydu a běharjom Andreasom Marschnerom je wurisanje zaso přikładnje organizowało. Wšitke tři běhi na dwaj, šěsć a dwanaće kilometrow wjedu po kołokursu a maja naročny profil. Hłownej čarje na 6 a 12 km wjedźetej na a po 426 m wysokim Hohbergu blisko Noweho Šěrachowa hač k 504 metry wysokej Motydłowskej wyšinje (Weifaer Höhe), a to přewažnje po lěsnych a pólnych pućikach. Po starće mějachu wobdźělnicy hnydom chětro nahły wotrězk na Wysoku horu po dołhosći nimale połdra kilometra přewinyć, kotryž do cila zaso jara spaduje. Starši starterojo zamóža tónle nahły wotrězk zwjetša jenož chodźo zmištrować.
Jasna naležnosć za hosći
SJ Njebjelčicy
– Módro-běli Kulow 0:10 (0:6)
Zestawa domjacych: Hahn, Ričel – Kral, Haška, Šram, Hanuza, Zeller, Lejnart, Čornak, Hrjehor, Pawlik, Korjeńk, Rudolf
We wokrjesnych koparskich ligach a klasach so nowa sezona bórze započnje. Mustwa so tuž z testowymi hrami přihotuja. Tak činještej to minjeny pjatk tež Njebjelčanske prěnje mustwo, kotrež hraje we wokrjesnej lize, a prěnje mustwo z Kulowa, kiž nastupi klasu wyše we wokrjesnej wyšej lize. Hižo zahe so pokaza, štó duel za sebje rozsudźi. Kulowčenjo sylnje započachu, wudobychu sej tójšto bulow a běchu tež před wrotami wuspěšni. Domjacy mějachu wulke ćeže jich škit, kotryž bu wot Bjarnata Korcha organizowany, přewinyć. Někotre razy drje so Njebjelčanam składnosć skićeše, akcije nadběhowarjow pak běchu přesłabe. Na tamnym boku wuhrachu sej hosćo wjacore šansy a trjechichu do połčasa šěsć razow. Trójce bě Marcus Thomas (6., 17., 29.), dwójce Paul Graf (22., 31.) a jónu Bjarnat Korch (42.), kiž wólny kop před šěsnatku direktnje přetwori.
Widźał,słyšał, napisał (31.07.17)
Awtor dźensa
Tadej Cyž
Přiwisnicy kopańcy, wšojedne na kotrej runinje, su zawěsće zbožowni, zo je lětnja přestawka w někotrych klasach zakónčena. Hač k zazběhej elitoweje klasy wšak dyrbimy hišće trochu čakać.
W druhej zwjazkowej lize su Dynamowcy wčera wuspěšnje do sezony startowali a z 1:0 MSV Duisburg přewinyli. Mjez fanami w stadionje bě tež zaso tójšto serbskich. Cyłk Uwe Neuhausa, kotryž bě po hrajnej dobje 2016/2017 wukonosylnych koparjow zhubił, je sej tuž prěnje wažne dypki wudobył. Hač do kónca transferneje periody wuhladamy zawěsće hišće toho abo tamneho noweho hrajerja w čorno-žołtym trikoće. Na kóncu pak je wažne, zo wostanu realisća. Dočasne zachowanje klasy a jednocyfrowe městno w tabulce byštej hižo wulkej wuspěchaj byłoj, wšako kóždy wě, kak ćežke druhe lěto je a kak spěšnje sy zaso w zestupnym boju.
Pěskečanski koparski cyłk turněr dobył
Na tradicionalnym koparskim turněrje we wobłuku Serbskopazličanskeho wjesneho swjedźenja hrajachu sobotu na sportnišću, kotrež bu hakle loni wotewrjene. Na wurisanju wobdźělichu so wjesne koparske cyłki z Njebjelčic (młodźina a stara garda), Pěskec, Radworja, Worklec a Serbskich Pazlic. Modus bě kóždy přećiwo kóždemu z hrajnym časom 12 mjeńšin.
Bój wo bul běše w kóždej hrě jara wulki, přiwšěm knježeše tež fairnosć. Přihladowarjo widźachu 15 partijow z dohromady 36 wrotami. Najwjace docpěchu w hrě Njebjelčicy-młodźina – Pěskecy, kotraž skónči so 0:7. Pěskečenjo su tež cyłkowny koparski turněr dobyli. Woni mějachu w hódnoćenju dźesać dypkow a wrotowy poměr 13:3 wrotow.
Dawid Matik
Wuslědki (31.07.17)
Regionalna koparska liga
Chemija Lipsk – Lok Lipsk 0:1 (0:1)
Neugersdorf – Budissa Budyšin 3:0 (2:0)
Altglienicke – Auerbach 1:1 (1:0)
Nordhausen – Halberstadt 1:1 (1:1)
Luckenwalde – BFC Dynamo 1:4 (1:0)
Fürstenwalde – Berlinski AK 2:2 (0:1)
Babelsberg 03 – Hertha BSC II 2:1 (1:0)
Neustrelitz – Energija Choćebuz 0:4 (0:1)
1.Energija Choćebuz 1 4 : 0 3
2.BFC Dynamo 1 4 : 1 3
3.Neugersdorf 1 3 : 0 3
4.Babelsberg 03 1 2 : 1 3
5.Lok Lipsk 1 1 : 0 3
6.Berlinski AK 1 2 : 2 1
6.Fürstenwalde 1 2 : 2 1
8.Nordhausen 1 1 : 1 1
8.Auerbach 1 1 : 1 1
Sport (28.07.17)
Swjećić a sportować
We wobłuku wjesneho swjedźenja w Serbskich Pazlicach přewjedu tam jutře, sobotu, na nowym sportnišću koparski turněr. Cyłkownje šěsć cyłkow so na nim wobdźěli: Pančicy-Kukow, Worklecy, Pěskecy, Njebjelčicy-stari knježa, Njebjelčicy-młodźina a hosćićel Serbske Pazlicy. W 13 hodź. započnu hrać.
Regionalna liga startuje
Regionalna koparska liga sewjerowuchod zahaji jutře, 29. julija, w 12 hodź. z brizantnym duelom BSG Chemija Lipsk – 1. FC Lokomotiwa Lipsk sezonu 2017/2018. Dalšu šlagrowu hru změje štwórta najwyša liga Němskeje njedźelu wot 11.15 hodź. To nastupitej FC Hornja Łužica Neugersdorf a Budissa Budyšin přećiwo sebi. Njedźelu w 13.30 hodź. hrajetej potom TSG Neustrelitz a FC Energija Choćebuz wo dypki.
Tura Satkule z premjeru
Radworska młodźina wuhotuje póndźelu, 31. julija, předposlednju staciju 4. bičwolejbuloweje tury Radija Satkula. Dokelž w Radworju hišće njeběchu, je to premjera. Tydźeń pozdźišo, 7. awgusta, přihoty na wulke finale, kotrež budźe 28. awgusta w Miłoćicach, w Budyšinje zakónča.
Testowe koparske hry
29.7. 14:00 Großenhainske KT
– Jednota Kamjenc
29.7. 17:00 ST Mały Wosyk
Jědnatki třěleli
Minjenu sobotu su delni Sulšečenjo swoje mjeztym štwórte třělenje jědnatkow we wobłuku wjesneho swjedźenja přewjedli. 24 mustwow so na nim wobdźěli. K wjeselu wšitkich su tež lětsa wurisanje hač do kónca přewjedli, byrnjež je sylne zliwki přeco zaso mylili. Po napjatych bojach Salowčenjo dobychu.
Prěni króć su sobotu tež na wulku koparsku dartowu sćěnu třěleli. Marko Koplanski z Nowoslic doby ze 128 dypkami před Clemensom Volkmarom z Kašec (117 dypkow).
Hišće raz k třělenju jědnatkow: Lětsa trjechichu aktiwni 366 króć, telko kaž hišće ženje do toho. Dohromady su statistikarjo w Sulšecach nětko 1 139 přetworjenych jědnatkow widźeli. Tysacte wrota poradźichu so Norbertej Grafej z mustwa Dołha garda w předkole přećiwo Pičkam ze suda. Graf dósta za to čestnu medalju.
Kónčne zaměstnjenje třělenja jědnatkow:
1. Salow
2. Spale
3. 1. FC Alkohol Sernjany
4. Brěžki
5. Pički ze suda
6. Šmiga Lepperschdorf
7. Koćina
8. Wildecker Herzbuben
9. 1. FC Alkohol Nowoslicy
10. Einsteinowy klub Wojerecy
11. Konjecy
12. Najmłódši dźe po piwo
13. Pěskecy
14. Pantherowi namrěwcy
15. Dołha garda
16. Lok Mučow
17. Přetworjerjo
18. Haslow
