Pančicy-Kukow. Štóž chce rjany lětni wječor při swěčkach, hudźbje a z kulinariskimi wosebitosćemi dožiwić, njech njeskomdźi sobotu, 23. julija, wot 19 hodź. zahrodowu nóc w zahrodźe klóštra Marijineje hwězdy w Pančicach-Kukowje. Nimo zahajenja sezony, klóšterskeho swjedźenja a zeloweje njedźele je to jedyn z wjerškow w běhu lěta, kotrež tam organizuja. Prjedy hač do wšelakich wobrazow zestajene wjacore tysac swěčkow zaswěća, poskića na jewišću atraktiwny program ze šlagrom, jazzom, akrobatiku, reju a wohnjowej show. Wjeselić smědźa so wopytowarjo mjez druhim na spěwarku Lenu-Loreen Kürschner, kotraž je jako JeLa S w telewizijnym wusyłanju sćelaka RTL „Deutschland sucht den Superstar“ nazhonjenja zběrała. Dale skutkuja sobu Drježdźanski jazzowy duwo Fokus, rejwanske studio TANZ3 a Drježdźanska artistka Heidi Witopil.
Dnja 2. awgusta před sto lětami narodźi so wuznamny moler Jan Buk. Na njeho spominamy jónu z titulnym wobrazom „Agrarne lětadło“ z lěta 1979. A w ramiku lětneje serije literarnych tekstow k jeho twórbam „Kóždy wobraz je nowy započatk“ jima so Christiana Piniekowa pjera a předstaji Buka jako wučerja za wuměłske kubłanje. Jako tajki běše hač do 1976 skutkował, prjedy hač bu swobodny wuměłc. Hewak steji w aktualnym Rozhledźe literatura w najšěršim zmysle w srjedźišću. Tak je so Marka Maćijowa ze spisowaćelku Měrku Mětowej rozmołwjała, kotraž powěda, kak je k pisanju přišła, zwotkel bjerje swoje temy a kotre plany ma za přichod. Takrjec jako doporučenje k čitanju wozjewimy dwě recensiji, a to jónu fundowanu a wěcywustojnu Dušana Hajduka-Veljkovića k zběrce „Stop a stup. Powědki, miniatury, eseje“ Měrany Cušcyneje. A Borbora Zyndźic je sej roman „Bjez čriji“ Ivony Březinoveje přečitała, kotryž staj Pětr Šołta a Jana Štillerová z čěšćiny přełožiłoj. Nimo toho wozjewimy literarnu skicu „Lejawa“ Ingrid Hustetoweje a basni „Marionety“ Ivana Wernischa a „Přeprošenje“ z pjera Oriah Mountain Dreamer.