Dalše kapacity trěbne

wutora, 09. meje 2017
artikl hódnoćić
(0 )

Dźěłanišćo za serbske kubłanske wuwiwanje (ABC) w Choćebuzu zhladowaše wčera ze swjatočnosću na 25. róčnicu załoženja. Milenka Rječcyna je měnjenja přitomnych gratulantow zestajała.

Claudia Kosacowa, referentka za serbske naležnosće w ministerstwje za kubłanje, młodźinu a sport: Před tydźenjomaj móžach so wo bohatosći nadawkow a wo projektach ABC přeswědčić. Sym přeco hišće połna zaćišćow wo angažemenće a motiwaciji, z kotrejž tu dźěłaja. Skutkowanje sobudźěłaćerjow ma nošnu rólu při posrědkowanju delnjoserbšćiny wosebje při zwoprawdźenju we wučbje, a to tež dalše 25 lět.

Cornelia Orphal, zastupowaca nawodnica statneho šulskeho zarjada Choćebuz: Dr. Christiana Piniekowa předstaji wuknjenske a wuwučowanske srědki, kotrež ABC wuwiwa. Byrnjež jara měrnje wustupowała, namołwi wona cyle wědomje šulski zarjad, skutkować jako multiplikator. Prošu wo dalše dobre zhromadne dźěło mjez wšitkimi partnerami, zo by so w našim regionje serbskosć zachowała. Jako šulski zarjad smy wjeseli, zo podpěruje nas ABC při pytanju a zdobywanju wučerskeho dorosta.

Angela Šurmanowa, wučerka na Delnjoserbskim gymnaziju a sobudźěłaćerka ABC: Swoje dwójne skutkowanje jako wučerka a sobudźěłaćerka tohole dźěłanišća mam za namołwu. Wšako mam na jednym boku teoretiske, na tamnym praktiske dźěło. Dyrbju přiznać, zo to jara napina. Wužitne je, zo skutkuja pola ABC nětko kolegojo ze wšitkich šulskich formow. Rady bychmy so wjace modernym medijam wěnowali. Za to pak pobrachuja dale kapacity.

Sabina Siegowa, zastupjerka direktora Załožby za serbski lud: Jako běchmy před lětami studij wučerjow w Podstupimje zarjadowali, bě to modelowy projekt. Poprawom so nadźijachmy, zo to kraj Braniborska dale wjedźe, štož pak so bohužel njeporadźi. Ćišć wučbnych srědkow, kotrež ABC wudawa, jako załožba rady spěchujemy. ABC ma swoje wuspěšne dźěło dale wjesć. Wjeselu so, zo mjeztym telko młodych wučerjow sobu dźěła, tež hdyž maja dweju dźěłodawarjow.

wozjewjene w: Měnjenja
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND