Na krajnej runinje sezona zakónčena

srjeda, 06. meje 2020
artikl hódnoćić
(0 )

Sakski koparski zwjazk (SFV) je wčera zdźělił, zo so sezona 2019/2020 na krajnej runinje 30. junija oficialnje skónči. Po dalšej widejokonferency zamołwitych SFV bu rozsudźene, zo žane dalše winowatostne hry wjace njebudu. Nimo toho bu rjadowane, kak dotalnu sezonu hódnoćić a kak z postupami a zestupami wobchadźeć. Načolnicy staflow njesmědźa so oficialny mišter mjenować, mustwa w pincy tabulki njetrjebaja ze­stu­pić, a postupy klasu wyše chce SFV z tak mjenowanym kwocientom rjadować. Cyłki, kotrež chcedźa postupić, dyrbja so hač­ do hišće njepostajeneho termi­na při­zjewić. Zamołwići za planowanje hrow w sezonje 2020/2021 budu na ličbu staflow, sylnosće staflow, postupy a zestupy a wšelake hrajne modusy fleksi­belnje reagować.

Pokalne wubědźowanja chce SFV rady hišće přewjesć, tež po 30. juniju 2020. Kilian Hrjehor

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND