Broschinski póńdźe k Borussiji

wutora, 12. meje 2020
artikl hódnoćić
(0 )
Nadběhowar Moritz Broschinski ma nětko zrěčenje na dwě lěće z druhim koparskim mustwom Borussije Dortmund.  Foto: Georg Zielonkowski Nadběhowar Moritz Broschinski ma nětko zrěčenje na dwě lěće z druhim koparskim mustwom Borussije Dortmund. Foto: Georg Zielonkowski

W přichodnej hrajnej dobje dyrbi so regio­nalny koparski ligist FC Energija Choćebuz słužbow nadběhowarja Moritza Broschinskeho wzdać. 19lětneho ćehnje po tučasnje přetorhnjenej sezonje do Poruhrskeje. Tam je wón pola druheho mustwa Borussije Dortmund (BVB) zrěčenje na dwě lěće podpisał.

Zamołwići BVB su sylneho nadběhowarja hižo w dorosće wobkedźbowali, jako hraješe wón za Energiju w zwjazkowej lize­. Pola Borussije Dortmund su zamołwići z nowopřichadom z Łužicy spokojom. Na homepage čorno-žołtych rěka: „Wjeselu so, zo je so Moritz jako talentowany a robustny ‚nowačk‘ za nas rozsudźił. Sym sej wěsty, zo wón cyły swój wulki potencial pola nas zasadźi.“ To pisa Ingo Preuß, sportowy nawoda U 23 Borussije Dortmund.

Z Grabina (Finsterwalde) pochadźacy Broschinski, kiž je lěta 2015 wot Brjazkow/Złeho Komorowa do Choćebuza přišoł, bě pola FC Energije w třećej lize w hrajnej dobje 2018/2019 dźesać razow zasadźeny. W aktualnej sezonje w regionalnej lize je wón 28 winowatostnych hrow absolwował, na 17 wrotach wobdźěleny był a dźewjeć sam třělił. Georg Zielonkowski

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND