Po dołhej přestawce dožiwichmy minjenu njedźelu skónčnje zazběh lětušeje sezony formule 1, a to w awstriskim Spielbergu.
Dołho su na komplikowanym hygienowym koncepće dźěłali, zo móhli docyła wubědźowanje tajkeho rozměra bjez strowotnych rizikow za wšitkich wobdźělenych přewjesć. Tež wšitcy stražnicy při čarje dyrbjachu wotpowědne wěstotne předpisy dodźeržeć. Zamołwići čary a swětoweje organizacija FIA su woprawdźe wulku prócu nałožili, wšitke rizika wobkedźbować a w 30 stronskim rjadowanju spisać. We wobłuku sobustawstwa w komisiji FIA běch tež ja do procesa zapřijaty. Próca je so wudaniła. Njemóžachmy žane wulke komplikacije registrować. To je zdobom dobra powěsć za wšitke serije w motorsporće, kotrež chcedźa ze swojimi běhami nětko tohorunja tak spěšnje kaž móžno započeć.