25. junija 2017 je druhe mustwo Sokoła Ralbicy/Hórki dotal swoju poslednju dypkowu hru přewjedło. Po tym so mustwo mało koparjow dla rozpušći, a wot toho časa eksistowaše w Delanach jenož hišće jedyn cyłk muži. Wot noweje sezony pak změja tam zaso dwej muskej mustwje, kaž je to Jurij Bjeńš wot Chrystofa Gloxyna zhonił.
Wot noweje sezony změje Sokoł RalbicyHórki zaso dwě koparskej mustwje muži. Trjechi to?
Ch. Gloxyn: Haj, cyle prawje. Hižo loni smy wo tym přemyslowali, rezerwu za prěnje mustwo Sokoła znowa załožić, tola tehdy mějach hišće trochu brjušebolenje. Třo do štyrjo hrajerjo mi tehdy pobrachowachu ...
... a lětsa tu su?
Ch. Gloxyn: Situacija je podobna kaž loni. Mamy něhdźe 30 aktiwnych koparjow, k tomu hišće toho abo tamneho, kiž by hdys a hdys někotre hry přewjedł. Chcu cyle jednorje kóždemu móžnosć skićić, kónc tydźenja jednu dypkowu hru přewjesć móc. Jako trenar běše za mnje minjeny čas stajnje jara ćežko. Wšako dyrbjach hrajerjam zdźělić, zo njejsu w kadrje. Tohodla je nuznje trjeba skónčnje zaso druhe mustwo pola Sokoła měć.