Hišće tři měsacy, potom startuje pjate koparske mišterstwo narodnych mjeńšin Europy. Tež Serbske mustwo přihotowaše so zašły pjatk na tutón sportowy wjeršk. Dočasnje wulki dźak starosće Serbskeho Sokoła z.t. Janej Hrjehorjej, wjesnjanosće gmejny Slepo Jörgej Fundźe a zamołwitym wot Lok Slepo. Woni zmóžnichu pjatkowny trening na kumštnym trawniku Němsko-serbskeho šulskeho kompleksa w Slepom. Za wobeju trenarjow Franka Ričela a Svena Ballacka bě to wužadanje scyła swobodny treningowy termin namakać, wšako su wšitcy potencielni kandidaća w běžnym hrajnym času a kónc tydźenja wotměwaja so we wšěch hrajnych klasach dypkowe hry.

18 koparjow pak zjewi so dypkownje 18 hodź. na městnje. Po krótkej narěči so treningowa jednotka tež hižo započa. Po někotrych lochkich čoplenskich zwučowanjach so najprjedy wšelake hrajne formy trenowachu. Tež taktiske směrnicy trenarjow dyrbjachu hrajerjo zwoprawdźić. Na kóncu přewjedźe so hišće kónčna hra.