Awtor dźensa
Michał Nuk
Sće hižo raz słyšeli wo beach-mjetańcy? Abo wo korfbulu? Abo wo powerboatingu? Tele dny maće składnosć, tute trochu eksotiske sportowe družiny na swětowym niwowje zeznać.
Wot 7. do 17. awgusta wotměwaja so mjenujcy w juhozapadnochinskim měsće Chengdu World Games – serbsce Swětowe hry. To su takrjec mjezynarodne wubědźowanja njeolympiskich sportowych družin. Tute wulkozarjadowanje, kotrež mjeztym hižo 34 lět eksistuje, přewjeduje so w samsnym turnusu kaž lěćne olympiske hry, jenož stajnje lěto pozdźišo. Prěni raz zetkachu so 1981 w US-ameriskim Santa Clara, tehdy hišće w 15 oficialnych a jednej tak mjenowanej přeprošenskej sportowej družinje. Wšo dohromady běše jich přibližnje 1 600 wobdźělnikow z 58 krajow. Tola kaž jich „wulki přikład“ su tež Swětowe hry mjeztym rozrostli. Runje, na XII. wurisanju zetkawa so na 4 000 sportowcow ze 116 krajow.
