Skromny a přećelny, horliwy Serb – takle wostawa mi a mnohim w pomjatku. Hakle sydomdźesatlětny je Wolfgang Jenč z Budestec dnja 13. oktobra zemrěł. Fachowc na polu módroćišća w Serbach a w Europje bě hakle njedawno najwažniše wuslědki swojeho wjelelětneho akribiskeho slědźenja wozjewił, mjez druhim kartu połsta historiskich stejnišćow módroćišćernjow we Łužicy.