Nowy swing po zabytej tradiciji
Originalne spěwy a serbske adapcije klasikarjow prěni raz předstajili
Pod nadpismom „Co by nadejšła? Slawischer Klang goes Bigband?“ wotmě so minjenu njedźelu njewšědny koncert na žurli Serbskeho ludoweho ansambla w Budyšinje. Wšako je skerje wuwzaće, zo zaklinča na tajkimle zarjadowanju wšitke wokalne twórby regularneho programa bjezwuwzaćnje prěni raz. Interpretowali su je spěwarka Lena Hauptmanojc, skupina Dresden Bigband kaž tež smyčkarjo SLA pod nawodom Michi Winklera.
Rěč wažny kluč za wuspěšnu integraciju
Na podijowu diskusiju k temje „Trjebani, ale tež witani“ w rozmołwnym rjedźe „SachsenSofa“ stej wčera Katolska akademija Drježdźansko-Mišnjanskeho biskopstwa a Sakska ewangelska akademija zhromadnje z Wojerowskej ludowej šulu a tamnišim měšćanskim muzejom na Wojerowski hród přeprosyłoj.
Wojerecy (AK/SN). Na diskusijnym podiju sedźachu: Afghaničanka Naija Karimi za Wojerowske towarstwo Immigrants Network, městopředsydka frakcije SPD w sakskim krajnym sejmje Laura Stellbrink a wědomostnik Němskeho centruma za integraciske a migraciske slědźenje w Berlinje dr. Niklas Harder. Naija Karimi běše před štyrjomi lětami we Wojerecach nowu domiznu namakała. Nimo intensiwnych integraciskich kursow je po jeje nazhonjenjach rěč wažny kluč za wuspěšnu integraciju, tak podšmórny w diskusiji. W swojej domiznje wuwučowaše na Goethowym instituće w Kabulu němčinu. Z tym pokročuje tež dźensa na Wojerowskej ludowej uniwersiće. Nimo toho je wona wukubłanje na běrowowu překupču w firmje Lausitzer Grauwacke tzwr we Wóslinku zahajiła.
Pućuja z Krabatom po swěće a přez časy
Böhlen (MBc/SN). W měsće Böhlen wosrjedź bywšich brunicowych jamow južnje Lipska přihotuja klankodźiwadło w němskej, hornjo- a delnjoserbskej rěči. „Krabat zemrěje“ abo „Krabat stirbt – Zauberstück für Stabpuppen und Drehleier“ rěka skerje swobodna interpretacija maćizny kołowokoło powěsće wo „dobrym serbskim kuzłarju“, kotruž chce wuměłstwowe duwo schoenbrodtkuerschner přichodnje premjernje předstajić.
Klankar Moritz Schönbrodt je awtor krucha a jón zhromadnje z hudźbnikom Johannesom Kürschnerom inscenuje. Klankodźiwadźelnica Linda Fülle wudospołnja team, kotryž so na eksperimentalne wašnje z powěsću wo Krabaće zaběra. W starej blidarni su sej swójsku dźěłarnju wuhotowali a tam kulisu, figury a rekwizity zhotowili. Žadyn z nich z Łužicy njepochadźa, z někotrymžkuli Serbom pak su so hižo zeznajomili. Wšitcy znaja „Krabata“ Otfrieda Preußlera ze šulskeho časa, za inscenaciju pak zdachu so jim twórby Jurja Brězana wo wjele kmańše być. Tak nastaty scenarij wotbłyšćuje w dobrej hodźince pućowanja Krabata po swěće a přez časy.
Festiwale serbskeje kultury sobu organizował
Skromny a přećelny, horliwy Serb – takle wostawa mi a mnohim w pomjatku. Hakle sydomdźesatlětny je Wolfgang Jenč z Budestec dnja 13. oktobra zemrěł. Fachowc na polu módroćišća w Serbach a w Europje bě hakle njedawno najwažniše wuslědki swojeho wjelelětneho akribiskeho slědźenja wozjewił, mjez druhim kartu połsta historiskich stejnišćow módroćišćernjow we Łužicy.
Filmaj z Balkana wuspěšnej
Na 35. Choćebuskim filmowym festiwalu dobyćerjow mytowali
Choćebuz (HA/KP/SN/bn). Mjezynarodna koprodukcija chorwatsko-čornohórskeje režiserki Ivony Juki „Lijepa večer, lijep dan“ je trójna dobyćerka wubědźowanjow we wobłuku wčera zakónčeneho 35. Choćebuskeho filmoweho festiwala (CFF). „Lubina“ za najlěpši pask spožči so jej za „zmužitosć, so njewuprajenym stawiznam přiwobroćić, dialog zahajić, stare rany sprawnje wobhladować a zmužiće wo pućach do přichoda rozmyslować“. Emirej Hadžihafizbegovićej (Bosniska a Hercegowina), kotryž sćělesnja hłownu rólu, přepodachu myto za najlěpši hrajerski wukon. Nimo toho zdoby sej film tež myto publikuma.
Wočakowanja přetrjechili
Wosebitu, jeno skrótka přistupnu přehladku wotewrjeli
Lipsk (TJ/nsk/SN). „Im Spülicht der Überamme“ rěka nowa wosebita wustajeńca, kotraž bu wčera w Lipšćanskim kulturnym domje Salon Similde wotewrjena. Přehladka, kotraž nawjazuje na ekspoziciju „Neue Sorbische Kunst (NSK)“ „Café Venedig“, pokazuje lětsa nastate twórby Bernharda Schippera kaž tež wudźěłki, kotrež maja po słowach wuměłca „prěnjotny serbski sydlenski rum wotbłyšćować a na słowjanski pochad sydlišćow Lipsk a Connewitz dopominać“. Nimo toho wopřijima wustajeńca dotal njepokazane eksponaty a nowonamakanki dźěłoweje skupiny hibanja NSK, zdźěłane wot lěta 1974 do 1989.
Z tutej instalaciju chce Schipper „z wuměłskim přepytowanjom kolonialneje dimensije praksy serbskich ćěšerkow w Berlinje za čas wilhelminskeje doby pokročować“. Zaměr je, recipientej z „wulgarno-martialiskej metaforiku“, kaž wuměłstwowa historikarka Ulrike Lorenz tworićelstwo Schippera wopisuje, zmóžnić, so na wšitkich zmysłowych runinach do tematiki zanurić. Zajimcy, kotřiž chcedźa sej wustajeńcu wobhladać, měli so do spěcha měć, přistupna je mjenujcy jenož hač do pjatka dźensa za tydźeń.
Stajny zajim za wubědźowanje
Budyšin (SN/bn). Dohromady 17 młodych, bjezwuwzaćnje hornjoserbsce tworjacych awtorkow a awtorow w starobje jědnaće do 29 lět wobdźěli so na lětušim literarnym wubědźowanju, kotrež je Ludowe nakładnistwo Domowina zhromadnje ze Załožbu za serbski lud znowa wupisało. W třoch kategorijach pytaja za młodymi talentami. Najsylniši je wobłuk lyrika ze 26 basnjemi z pjera cyłkownje dwanaće dorostowych basnicow a basnikow. Za wobłuk lyriska proza a krótkopowědančko bu pjeć awtorskich přinoškow namjetowanych. W kategoriji proza a dramatika su štyrjo pisacy runja telko twórbow zapodało.
W kóždej kategoriji spožča so maksimalnje tři myta w cyłkownej hódnoće 1 750 eurow. K tomu wuznamjeni so přidatnje najlěpši přinošk, spisany wot wobdźělnicow a wobdźělnikow pod 16 lětami. Wšitkim zapodawacym kiwaja za „dalše radźene přinoški“ dobropisy za nakup w Smolerjec kniharni.
Wuznamjenjene twórby maja so w přichodnej antologiji rjadu LND „LitMiks“ – hač do lońšeho znaty jako „Paternoster“ – resp. w Rozhledźe wozjewić.
Delnjoserbsku premjeru trikoweho filma woswjećili
Choćebuz (NC/KP). W lěće 1989 natoči serbski režiser a awtor Jan Hempel w kooperaciji z DEFA-studijom trikowy film z klankami pod titulom „Als es noch Wassermänner gab“ na zakładźe swojeje dźěćaceje knihi „Kak bu wódny muž braška“. 34 lět pozdźišo, mjenujcy minjenu njedźelu, swjećeše film pod titulom „Ako su hyšći žywe byli wódne muže“ swoju delnjoserbsku premjeru. Něhdźe 30 dorosćenych a dźesać dźěći ju w Choćebuskim filmowym dźiwadle Obenkino we wobłuku ramikoweho programa 35. Choćebuskeho filmoweho festiwala (CFF) dožiwi.
