Budyšin (SN/CoR). „Často bě Jurij Brězan z hosćom tu, a přeco běchu to wusahowace wokomiki. Wulkotnje, zo móžemy jeho nětko česćić“, praji sobudźěłaćerka měšćanskeje biblioteki Gabriele Ankele wčera wječor na Budyskej knižnej premjerje biografije wo najwuznamnišim serbskim spisowaćelu 20. lětstotka. Połna bě žurla, jako předstaji awtor prof. dr. Dietrich Šołta něhdźe 60 zajimcam knihu, nastatu składnostnje 100. posmjertnych narodnin Brězana 9. junija. Mjez hosćimi bě Christian Stottele, kiž je w Ravensburgskim nakładnistwje Otto Maier Brězanowe knihi wudawał.

Budyšenjo sej swojeho Jurja Brězana jara česća – tónle zaćišć znajmjeńša zawostaji wčerawša Budyska knižna premjera jeho biografije. Awtor prof. dr. Dietrich Šołta pak wuži składnosć a skedźbni zwjetša němskich přitomnych hišće raz na to, zo „smy my Budyšenjo zaprajili“. Lubosć njebě před dźesać lětami tajka wulka, zo bychu Brězanej dostojnosć čestneho wobydlerja spožčili. Biograf wčera k tomu namołwi, sej wuznam Brězana tež jako jednoho z wulkich němskich a zdobom Budyskich spisowaćelow wuwědomić. Swjedźenske zarjadowanja składnostnje 100. posmjert­nych narodnin literata so za to derje hodźa. A snano jenož při tym njewostanje. Wšako su móžnosće, wosobinu z wusahowacym wuznamom tež dźensa hišće česćić. Móžeš na přikład dróhu po Jurju Brězanu pomjenować. Šansu město Budyšin ma, njech ju tónraz wužiwa – radšo pozdźe hač ženje. Cordula Ratajczakowa

24. meje 1991 zeńdźechu so zastupnicy serbskich chórow w Budyskim Serbskim domje a wutworichu po čiłej diskusiji Zwjazk serbskich spěwarskich towarstwow (ZSST). Za jeho předsydu wuzwolichu Achima Brankačka, za městopřed­sydu Křesćana Baumgärtela. Za hłowneho dirigenta powołachu hudźbneho direktora Jana Bulanka. Zwjazk koordinuje prócowanja wo pěstowanje serbskeho spěwa, ma organizować spěwne swjedźenje a předstajenja oratorijow kaž tež hajić zwiski z druhimi ćělesami w słowjanskim wukraju, w Němskej a z tymi narodnych mjeńšin. Na załoženju ZSST před 25 lětami zastupjene běchu chóry Meja, Delany, Lipa, Budyšin, 1. serbska kulturna bri­gada, Šule Ćišinskeho z Pančic-Kukowa a Serbskeje wyšeje šule Budyšin. Chóry Delnjeje a srjedźneje Łužicy přistupichu něšto dnjow po tym. Slěborny jubilej woswjeći­ ZSST z koncertomaj 4. junija w Choćebuzu a dźeń po tym w Budyskim Němsko-Serbskim ludowym dźiwadle.

Manfred Laduš