Čitar Měrćin Wałda je w zwisku z wutornišim přilopkom „Wjele pjenjez, ­žadyn plan“ pod titulom „Zhromadnje – prjedy hač je přepozdźe“ swoje mysle napisał:

W nowšim ameriskim filmje „Astronawt – Project Hail Mary“ dóńdźe ke globalnej katastrofje – z njej pak stanje so něšto njewočakowaneho: Američenjo, Rusojo, Chinjenjo a Europjenjo so zeńdu a wuradźuja, kak móhli zhromadnje postupować. Žana njedowěra, žana zwada, žana kompetencna rozkora. Jenož zhromadna wola, něšto wuchować, štož wšitkim słuša.

A my? Widźimy film a myslimy sej: To by rjenje było! Abo dyrbi traš najprjedy ke katastrofje přińć? Serbja njesteja před kosmiskej katastrofu, ale před realnej: rěču, kotraž bywa dźeń a mjelčiša. Prašam so: Je tež mjez nami móžno, štož so w filmje radźi? Zo so zamołwići ludźo zetkaja? Serbja z Hornjeje a Delnjeje Łužicy a z diaspory. Towarstwa a zwjazki, kotrež hewak njedowěrliwje na so hladaja. Ewangelska a katolska strona. Aktiwisća a tradicionalisća. Młodźi a stari. A haj – tež němscy susodźa, spěchowarjo, politikarjo.