K přinoškej „Digitalna doba je wužadanje“, kotryž Serbske Nowiny 21. meje wozjewichu, je čitar Měto Nowak swoje mysle napisał:

W přinošku so derje rozłožuje, čehodla ma nowina La Usc di Ladins wjele čitarjow a čitarkow: Wona ma zwjazowacu funkciju za ladinsku towaršnosć, kajkuž němske resp. italske medije nimaja. Tež najwšelakoriše ladinske narěče w přinoškach nałožuja. Hladajo na to so prašam, hač njeby snano na času było, zo jedyn serbskorěčny medij wutworimy. Spochi prajimy, zo smy jedyn serbski lud. Ale što poprawom wo wšědnym dnju našich bratrow a sotrow we Łužicy wěmy? Kak husto mamy kontakt k druhej serbskej rěči?