Składnostnje bližaceje so 25. róčnicy Chróšćan zběžka je Marcel Brauman z Markom Šimanom, serbskim zapósłancom Sakskeho krajneho sejma, wo dopomnjenkach a konkluzijach rěčał.

Budyšin (SN/mb). Hač do dźensnišeho ma Marko Šiman „wulki respekt před wšěmi ludźimi, kotřiž su so tam angažowali“. Aktualnje je wón za europsku politiku frakcije CDU zamołwity, před 25 lětami bě prawniskopolitiski rěčnik. Jako tajki bě kónc awgusta 2001 kultusoweho ministra Matthiasa Rößlera (CDU) kritizował: „Kultusowy minister je wjacore měsacy chwile měł, zo by do směra kompromisa za zachowanje šulow we wjesnych kónčinach dźěłał. Ale wón je pokiwy, nastorki a wobzamknjenja frakcije CDU ignorował.“ Zdobom namołwješe ministerskeho prezidenta Kurta Biedenkopfa, zo by do rozestajenja wo 5. lětnik srjedźneje šule w Chrósćicach zapřimnył. Za tutymi nastorkami tčeše ideja Šimana, šulski zwjazk załožić a z tym wšě šulske stejnišća zachować.