Cyłu blešu wódki wupił a na to sej wusnył je paduch we wobchodźe w Stühlingenje njedaloko badensko-württembergskeho Waldshuta. Policija jeho nańdźe, po tym zo bě alarmowa připrawa reagowała. Wokoło paducha ležachu cigarety, serp za zahrodu a tyza sprayja za włosy. Dalša bleša wódki bě rozbita. 41lětny bě so přez zachodne durje do wobchoda zadobył. Zastojnicy jeho zajachu.
K hotowej bijeńcy psyčeho howna dla je w sewjerorynsko-westfalskim Bergisch-Gladbachu dóšło. Psyk 32lětneje bě w měšćanskim parku hromadku zawostajił. 33lětna sej po informacijach policije wot njeje žadaše, zo ma zawostajenstwo zrumować. Bjez wuspěcha. Žonje na so bjakaštej. Na to zlećachu kluče do hłowy wobsedźerki psa, kotraž sej pomocnikow wobstara. Na kóncu so pjeć wosobow biješe, doniž policija njepřijědźe.
Prezentuja halowe domy
Zhorjelc (dpa/SN/ch). Město Zhorjelc chce w Bonnje wo přiwzaće do lisćiny swětoweho namrěwstwa wabić. K tomu chce w Bonnskim wuměłstwowym muzeju wustajeńcu wo swojich halowych domach prezentować, kaž město nad Nysu wčera zdźěli. Hišće hač do 8. julija schadźuja so w Bonnje wobdźělnicy z cyłeho swěta k 39. posedźenju komiteja swětoweho namrěwstwa. „Za nas je to dobra šansa, nadregionalnje na swoje halowe domy skedźbnić“, rozłoži Zhorjelski wyši měšćanosta Siegfried Deinege (njestronjan). Wón připowědźi, zo chce wo politisku, financnu a ideelnu podpěru wabić. Zhorjelc njebu loni do němskeje lisćiny namjetow za swětowe namrěwstwo přiwzaty. Přichodne móžnosće toho bychu lěta 2017 do 2019 byli.
Žitne žně zahajene
Athen/Brüssel/Berlin (dpa/SN/K). We wadźeńcy grjekskeje krizy zadołženja dla je tola hišće k dalšemu kołu dóšło. Financni ministrojo europasma přewjedźechu dźensa připołdnju telefonisku konferencu wo zajědźenej situaciji kraja, kotremuž hrozy statny bankrot. Diplomaća EU wočakowachu dalše namjety Athena wo reformach a lutowanju.
1. julija 1990 je so tež w žiwjenju Serbow tójšto změniło, wšako běchu woni tohorunja wot hospodarskeje a měnoweje unije potrjecheni. We wukładnych woknach wobchodow ležachu nadobo zapadne wudźěłki. Wo NDRske produkty hižo nichtó njerodźeše.
Nowa doba je tehdy dosć wobšěrnje wo wonej historiskej změnje w žiwjenju ludźi rozprawjała, tež do toho. Tak pisaše 21. junija 1990, zo je sej Budyska měšćanska Domowinska skupina 36 z konjacym zapřahom wulećała. Při tym njezataji, zo měješe zarjadowanje cyle praktiski zmysł: Domowinjenjo chcychu pjenjezy w kasy přetrjebać, „zo njebychu spadnyli“. Po 1. juliju nowiny z wjacorymi přinoškami wo nowym času informowachu. Tak přewodźachu 83lětnu Madlenu Bjaršowu a 81lětnu Marju Šołćinu při prěnim nakupowanju z D-hriwnami w Pančicach-Kukowje.
Chěžu twarjacy roboter je awstralske předewzaće wuwiło. Po informacijach firmy z města Perth trjeba mašina z mjenom „Hadrian“ runje dwaj dnjej, zo by wonkowne murje domu stajiła. Z 28 metrow dołhej teleskopowej ruku móže tysac cyhelow wob hodźinu kłasć. Dźěło wotběži dospołnje awtomatisce. W běhu lěta chcedźa 150 domow z roboterom natwarić. Firma hižo dźesać lět na swojim rewolucionarnym nastroju dźěła.
Na awtodróze běhaca kóčka je šoferku na A4 w Durinskej k přewšo zwažliwej pomocnej akciji pohnuła. Po informacijach policije žona na nabóčnej čarje zasta a spyta najebać wulki wobchad wustróžane zwěrjo popadnyć, kotrež bě sej na srjedźne wobhrodźenje awtodróhi wućeknyło. Při tym žona jězdnju dwójce přeprěči. Skónčnje pak wołaše policiju wo pomoc, a wona kóčku popadny.