Heinricha Böllowa załožba wo přichodźe po dobje brunicy diskutowała

Choćebuz (beo/SN). Prowokantnje a kecarsce je Zwjazkej 90/Zelenym bliska Heinricha Böllowa załožba wčera wječor prašenje na taflu w seminarskej rumnosći 4 uniwersity Choćebuz-Zły Komorow napisała: „Sylna Łužica bjez wuhla?“ Nimale 50 ludźi je so za diskusiju zajimowało. Matadorojo na podiju kaž energijowy eksperta Arne Jungjohann, krajny rada­ wo­krjesa Sprjewja-Nysa Harald Altekrüger (CDU) a zapósłanča w Krajnym sejmje Braniborskeje Heide Schinowsky (Zwjazk 90/Zeleni) spytachu, w běhu dwuhodźinskeje debaty na wšitke zajimowace prašenja wotmołwić. Wuchadźišćo bě w juniju wot Bölloweje załožby wudaty wuhlowy atlas. Tón jenož akribisce wuhlowe łožišća po wšěm swěće njenalistuje, ale kładźe zdobom „porst do rany“ dramatiskich wobswětowych a čłowjeskich škodow. Łužiskej brunicy so wčera wosebje wěnowachu.