Šulscy wotchadnicy maja prawdźepodobnje luksusowy problem
Budyšin (SN/BŠe). Šulscy wotchadnicy w Hornjej Łužicy maja najlěpše powołanske perspektiwy a tak tuž prawdźepodobnje luksusowy problem, z wulkeho wuběra wukubłanskich městnow wuzwolić.
W lěću započnje so nowe wukubłanske lěto a hišće je wjele wukubłanskich městnow swobodnych. Budyska agentura za dźěło přizjewi w aprylu za wokrjes Budyšin 876 hišće njewobsadźenych wukubłanskich městnow – 4,1 procent mjenje hač loni. „Su potajkim jara dobre šansy, wukubłanje w regionje nańć“, měni jednaćelka za operatiwny wobłuk Budyskeje dźěłoweje agentury Ilona Winge-Paul. Zdobom wona praji, zo njeje za młodostnych přeco lochko, so skónčnje za jedne z 350 najwšelakorišich powołanjow w Němskej rozsudźić.