W dole, cyle blisko Nysy w Zhorjelcu steja poměrnje wysoke, ale idyliske twarjenja – mjez nimi tež młyn, „Horni młyn“ mjenowany. To je hosćenc, hdźež mějićelka domu Susanne Daubner tež piwo wari. Wot lěta 1999 je na prěnim poschodźe młyna, kotryž tam hižo wot 14. lětstotka steji, mólička piwarnja zaměstnjena. Jako Daubnerecy młyn na hosćenc z pensiju přetwarichu, zrodźichu woni mysličku, swojim hosćom nimo słódneje jědźe tež jónkrótne domjace piwo poskićeć.