Tysacy na třidnjowskim swjedźenju – klětu budźe wón w Słowjenskej
Kulow (SN/MWj). Z wustupom Smjerdźečanskeje rejwanskeje skupiny a ze šlagrowej spěwarku Utu Brězanec skónči so wčera nawječor 15. Krabatowy swjedźeń w Kulowje. Po wuprajenju Beaty Hufnagel z měšćanskeho zarjadnistwa je wjace hač 10 000 ludźi wot pjatka hač do njedźele najwšelakoriše poskitki wopytowało. Předewšěm wčera popołdnju za čas swjedźenskeho programa bě stan před jewišćom na torhošću kopaty połny.
Serbske programowe dypki su ludźi wosebje přiwabili. Jako je na přikład Kulowska zakładna šula „Krabat“ serbski kwasny ćah z brašku Geratom Róblom předstajiła, bě před jewišćom lědma swobodneho městna. Podobny wobraz skićeše so při programje Smjerdźečanskich rejwarjow. K jich hudźbje njeje publikum jenož rytmisce sobu kleskał, ale sej na kóncu samo přidawk wužadał. Židźinski chór z dirigentku Kerstin Liederowej je wjacore serbske pěsnje zanjesł.