Błótowske zawody zaručeja najznaćiše kórki Němskeje. Kónc junija su tam žně zahajili. Něhdźe 3 000 pomocnikow nětko něhdźe 30 000 tonow kórkow žněje a předźěłuje.

Lubnjow (SN/BŠe). Błótowske kórki su mjeztym 17 lět jako wosebita marka škitane a su tak kwalitny produkt. „Kórki su stoprocentowsce z regiona“, zwurazni jednaćel Błótowskeho towarstwa Lutz Habermann, zastupjer produkciskich zawodow. Cyłkownje dźesać ratarskich předewzaćow znatu zeleninu plahuje. Dźewjeć zawodow čerstwe kórki z polow po tradicionalnych recepturach předźěłuje.

Zawjedźenje minimalneje mzdy je k tomu wjedło, zo su tež kórki z Błótow dróše, a to něhdźe dwaceći centow wjac na škleńcu. Nětko zaleži na kupcach, hač za regionalny a kontrolowany wudźěłk wjace pjenjez wudawaja.

Lětsa plahuja ratarjo kórki na něhdźe 450 hektarach, hdźež chcedźa 30 000 tonow nažnjeć. Dotal tež tak wupada, zo tónle zaměr docpěja.