Gubin/Choćebuz (SN/BŠe). Plany, wotkryć pólski brunicowy rewěr blisko Gubina, su najprjedy raz zastajene. „Spjećowanje wobydlerjow a komunow na pólskej kaž tež němskej stronje podłu Nysy přećiwo planam inwestora Polska Grupa Energetyczna (PGE) su so wudanili“, zdźěli zamołwity za brunicowy wobłuk wobswětoškitneje organizacije Zelena liga w Choćebuzu Renej Šuster.
Zamołwita regionalna direkcija za přirodoškit w pólskim Gorzowje je wusadźenje jednanja za wotkryće brunicoweje jamy připowědźiła, po tym zo njebě PGE pobrachowace podłožki wobswětoškitneho pruwowanja předpołožiła. Kaž zarjad zdźěli, chce inwestor podłožki zapodać, trjeba pak hišće trochu chwile. Dokumenty maja w běhu třoch lět předležeć, zo móhli jednanja znowa zahajić.
