Zwjazkowe hospodarske ministerstwo na list z Łužicy skónčnje reagowało
Budyšin (SN/BŠe). Komunalne zwjazkarstwo Łužiske koło, wobstejace z 23 wokrjesow a komunow braniborskeje a sakskeje Łužicy, schadźuje so 21. septembra k rozmołwje ze zwjazkowym ministrom za hospodarstwo Sigmarom Gabrielom (SPD). Přičina toho je list kanclerce Angeli Merkel (CDU), kotryž běchu zastupjerjo Łužiskeho koła spočatk junija zhromadnje podpisali. 21. junija staj jón rěčnikaj koła, Grodkowska měšćanostka Christine Herntier (njestronjanka) a wyši měšćanosta Běłeje Wody Torsten Pötzsch (Klartext), šefej zarjada zwjazkoweje kanclerki Peterej Altmaierej (CDU) w Berlinje wosobinsce přepodałoj. Hižo w prěnjej rozmołwje z Altmaierom bě jasne, zo tež wón wobsah lista chutnje bjerje a podpěruje.
