Hospodarstwo Hornjeje Łužicy pyta za wukubłanymi­ fachowcami, a to we wšěch starobnych skupinach, rěkaše dźensa na nowinarskej rozmołwje Budyskeje dźěłoweje agentury.

Budyšin (CK/SN). Sobudźěłaćerjo Budyskeje agentury za dźěło móža tuchwilu 3 500 dźěłowych městnow z winowatostnym socialnym zawěsćenjom poskićeć. To je 44 wjace hač w juliju. „Wo lětnjej přestawce na dźěłowych wikach lětsa ničo pytnyć njebě“, rjekny dźensa dopoł­dnja šef agentury Thomas Berndt. Wot spočatka lěta je ličba swobodnych městnow wobstajnje přiběrała. W septembru liči Berndt z dalšimi poskitkami. Po dotalnych nazhonjenjach su dźěłodawarjo nazymu jara zwólniwi, nowych sobudźěłaćerjow při­stajić. Přede­wšěm fachowcy maja dobre šansy. Rozdźělene po powołanskich skupinach maja z 1 620 najwjace swobodnych městnow we wudobywanju surowiznow, produkciji a zhotowjenju. 500 městnow ma so we wobłuku strowotnistwo, socialne a kubłanje wobsadźić, nimale 400 we wobchadźe a 340 w twarstwje.