Studenća ze strukturnej změnu we Łužicy so zaběrali
Picnjo (AK/SN). Strukturna změna we Łužicy žada sej dołhodobne, hłuboko sahace strategiske wizije. „W regionje chowa so tójšto potenciala, nowosće widźeć. Njezapočinamy pak při nuli. Tradicija a inowacija hodźitej so ze sobu zwjazać. Trjebamy tójšto syćow a akterow, kotřiž připosłuchaja a sobu mysla“, je farar dr. Eckhard Zemmrich, referent w konsistoriju Ewangelskeje cyrkwje Berlin-Braniborska-šleska Hornja Łužica, wčerawše fachowe zeńdźenje w Picnju zjimał. Zarjadowanje wotmě so pod hesłom „Łužiska strukturna změna: wobrazy přichoda za Picnjo a region“. Nimale 80 wobdźělnikow z komunow, předewzaćow, wobswětowych skupin a wosadow bě přeprošenje organizatorow – instituta za strategiske wuwiće uniwersity Liechtenstein, Choćebuskeho ewangelskeho cyrkwinskeho kruha a Choćebuskeje wobswětoweje skupiny Zeleneje ligi – sćěhowało.