Chcedźa masterski plan za Hórnikečanski jězor zhotowić
Łaz (AK/SN). Hórnistwoweho saněrowanja dla zawrjeny Hórnikečanski jězor ma so turistisce zaso wožiwić. Tole podšmórny jednaćel sakskeho zaměroweho zwjazka Łužiska jězorina Daniel Just na wčerawšej zhromadźiznje we Łazu. Tam su jednohłósnje wobzamknyli, zhotowić masterski plan za jězor a bliske wodźizny. Něhdźe 30 000 eurow ma plan cyłkownje płaćić. Zaměrowy zwjazk přewozmje 25 procentow. Tamne 75 procentow chcedźa ze spěchowanskeho programa Swobodneho stata Sakskeje „FR Regio“ financować. „Próstwu su tam na potrjebu srjedźneje priority zastopnjowali“, wuswětli Just. „Nadźijamy so, zo zdźělenka wo přizwolenju spěchowanskich srědkow hač do kónca 2016 předleži. Hižo spočatk noweho lěta chcemy ze zhotowjenjom plana započeć.“
