Bórkhamor (JoS/SN). Na Jantarowym jězorje je nowa saněrowanska łódź z mjenom Brahe III zasadźena. Zašły tydźeń běchu ju fachowcy centralneje přepytowanskeje komisije přepruwowali a za hórnistwowe saněrowanje dowolili. Łódź słuša němsko-šwedskemu předewzaću MOVAB-D ze sydłom we Łutach, kotrež ma wjelelětne nazhonjenja z techniku, kisału wodu neutralizować. W tymle wobłuku dźěłaja z fachowcami Freibergskeje hórniskeje akademije a ze šwedskimi twarcami łódźow a wapnowej industriju wusko hromadźe, zo bychu dobre wuslědki docpěli. Kisała woda w jězorach je sćěh wudobywanja brunicy.
Na nětko zasadźenej łódźi móža hnydom na městnje wapnowu maćiznu zhotowjeć, kotruž potom do jězora sypaja. A tole je chětro eficientne. Z pomocu kompleksneho matematiskeho modela zamóža fachowcy MOVAB-D prudy jězora wobličić. Z toho hodźi so potom optimalne rozdźělenje wapna we wodźe postajić.
