Regionalny planowanski zwjazk Hornja Łužica-Delnja Šleska liči najzašo kónc meje, spočatk junija 2017 z rozsudom nastupajo brunicowu jamu Wochozy II. To podšmórny jeho předsyda, Zhorjelski krajny rada Bernd Lange (CDU), na zwjazkowej zhromadźiznje wčera w měsće nad Nysu.

Zhorjelc (AK/SN). „To bě jara konstruktiwna rozmołwa“, zdźěli Bernd Lange zwjazkowym radźićelam. Minjeny tydźeń zetka so wón z dr. Helmarom Rendezom, nawodu předsydstwa předewzaćow Łužiska energija hórnistwo AG a Łužiska energija milinarnje AG (LEAG). „Rozjimałoj smój wuskutkowanje prioritneje kónčiny jamy Wochozy II. Rěčałoj smój tohorunja wo wuskutkach změnjeneho abo wo wuskutkach žanoho wužiwanja“, Bernd Lange wuwjedźe. Zdobom informowaše wón wo posedźenju Slepjanskeje přirady za brunicu w nowem­brje. Tež tu dźěše wo naležnosć bórzomneho, jasneho, zawjazowaceho wuprajenja nastupajo jamu Wochozy II. Za nuznje trěbne maja dalše komunalne poradźowanje. Vattenfall bě zrěčenje z dotalnym komunalnym poradźowarjom za gmejnje Slepo a Trjebin Thomasom Jansenom wupowědźił.