Předewzaća a zarjadnišća třeći raz tudyše móžnosće předstajili
Budyšin (JK/SN). Hospodarstwo Budyskeho wokrjesa a Hornjeje Łužicy so derje wuwiwa. Za dalši stabilny rozrost a wuspěch rjemjesła a srjedźostawskich předewzaćow su a budu dale derje wukubłani fachowcy trěbni. Mnozy z tych, kotřiž běchu lěpšich dźěłowych a žiwjenskich wuměnjenjow dla do zapadnych zwjazkowych krajow šli, noša so z myslu, so zaso do Budyskeho wokrjesa abo do Hornjeje Łužicy nawróćić. Jim wotpowědnu pomoc poskićić, zo bychu nimo wotpowědneho dźěła tež wěste žiwjenske a swójbne zakłady w domiznje nadešli, je zaměr zhromadneje akcije krajnoradneho zarjada, dźěłoweje agentury a rjemjeslniskeje komory Budyskeho wokrjesa pod hesłom „Zaso tu“.
