Bórk (SN/JoS). We wjesnym dźělu gmejny Sprjewiny Doł Bórku je předewzaćel Karsten Rudolph wjele pjenjez inwestował a sydlišćo seniorow z mjenom „Nazymske słónco“ rozšěrił. Za 550 000 eurow natwari wón dwaj nowej domaj, kotrejž budźetej po doskónčnym dozhotowjenju wonkowny napohlad wsy wobohaćeć. Prěnjorjadnje chce předewzaćel na pomoc pokazanym ludźom domiznu skićić, hdźež so derje čuja a su wobstarani. „Naprašowanje za hladanskimi městnami je jara wulke“, Karsten Rudolph wobkruća. Do wobeju domow móže přichodnje dźesać ludźi zaćahnyć. Stwy su jednowosobowe ze swójskej sanitarnej rumnosću a kuchnju. K tomu přińdźe hišće zhromadna přebywarnja, w kotrejž móža so wobydlerjo zetkać. Kóždy dom ma 150 kwadratnych metrow zakładneje płoniny.
W lěta 2003 natwarjenym sydlišću je tuchwilu 17 hladarjow, kotřiž su wo 21 wuměnkarjow staraja. Ličba sobudźěłaćerjow ma so na 20 rozšěrić.
Jedyn z noweju domow je mjeztym wuknihowany. Za tamny su hižo zajimcy, z kotrymiž zamołwići tuchwilu rozmołwy wjedu. Bydlenja su tak planowali, zo je wěsta samostatnosć wobydlerjow zaručena.