Stróža (SN/BŠe). Łuka w Hornjej Łužicy móhła so z přirodnym dźiwom Němskeje 2017 stać. Wo to prócuje so tuchwilu biosferowy rezerwat Hornjołužiska hola a haty ze sydłom w Stróži, wobdźělacy so na wubědźowanju Heinza Sielmannoweje załožby. Z woprawdźitym pokładom – najwjetšej łuku Němskeje z dźiwimi gladiolemi při Dubjanskim lěsu – su so zamołwići rezerwata wo myto požadali. A kaž aktualny staw hłosow w interneće přeradźa, bě rozsud prawy. „Wot spočatka wubědźowanja w juniju ležimy na prěnim městnje. Hač do 10. septembra móža ludźo hišće na wotpowědnej internetnej stronje wothłosować“, wjeseli so sobudźěłaćerka zjawnostneho wotrjada biosferoweho rezerwata Mareen Kühn. Dźensa rano měješe łužiska łuka 16 procentow hłosow, ale tamni požadarjo chětro nachwatuja. Hnydom tři łuki na zapadźe Němskeje su minjene 24 hodźin wjele přihłosowanja žnjeli a su wšitke z ně­hdźe jědnaće procentami łuce gladiolow na pjatach.