Z prěčnym haćenjom wotwobaraja strach přepławjenja

štwórtk, 28. septembera 2017
artikl hódnoćić
(0 )
Přeběh prěčneho haćenja do směra na zjednoćenje Małeje Sprjewje ze Sprjewju w Sprjejcach  Foto: Jost Schmidtchen Přeběh prěčneho haćenja do směra na zjednoćenje Małeje Sprjewje ze Sprjewju w Sprjejcach Foto: Jost Schmidtchen

Sprjejcy (JoS/SN). Saněrowany nasyp podłu Małeje a wulkeje Sprjewje je pokazanjahódny objekt z techniskimi wosebitosćemi. Saněrowanske dźěła su hižo spočatk septembra wotzamknyli. Wosebitosć je prěčne haćenje wot wuchoda na zapad, kotrež su wot měrjenskeje stacije pegela nimale hač k wokrjesnej dróze twarili. Dospołny areal z pućemi a łukami dóstawa tak swój prěnjotny napohlad. Jeničce za wozydła krajneho zarjadnistwa rěčnych zawěrow a za zasadźenske wozydła w strašnym padźe wostawa wobrotnišćo na kromje wsy při wuliwje Małeje Sprjewje.

Prěni raz su na nasypje blisko mosta přez Mału Sprjewju tež hižo trawu sykli. „Za dodźerženje a hladanje haćenja je krajne zarjadnistwo rěčnych zawěrow přisłušne“, rjekny projektowa nawodnica Cathleen Steinert. „Bě hnydom widźeć, zo mamy tu hišće raz symjo wusyć. Husta trawa je jara wažna za skutkownosć nasypa. Tohodla wostanu tež hišće zaraćenja niže mosta, zo njeby nichtó na do­twarjeny nasyp stupił.“

wozjewjene w: Hospodarstwo
Prošu přizjewće so, chceće-li komentar podać

nawěšk

nowostki LND