Wochožanski park błudźenkow loni 61 000 hosći přiwabił
Wochozy (SN/mwe). Wot zahajenja lětušeje sezony 15. měrca budźe zachodna tafla „Park błudźenkow Wochozy“ w jenakej wulkosći tež serbskorěčnje wuhotowana. Tež dalše tafle w parku maja přichodnje dwurěčne być. „Zo smy w dwurěčnej Łužicy zakorjenjeni, pak njeje jenož na taflach spóznajomne. Wotnětka podawamy informacije w parkowym flajeru tež w serbskej rěči. Wotewrěć chcemy z předsydu towarstwa Serbski kulturny turizm Manfredom Hermašom po nowinarskej konferency 15. měrca wustajeńcu k serbskim temam. Slepjanske dźěći k tomu mały kulturny program předstaja.“ Tole praji Ulrich Klinkert, předsyda spěchowanskeho towarstwa Łužiski park błudźenkow Wochozy. Po politiskim přewróće bě wón dlěje hač tři legislaturne periody zapósłanc Němskeho zwjazkoweho sejma, hdźež je so mjez druhim za naležnosće serbskich komunow a jich wobydlerjow zasadźował.