Najebać zymny měrc su w planje

Wulki Wjelkow/Róžant/Hózk (SN/BŠe). Přijomne wjedro z temperaturami wokoło 20 stopjenjow a dosć spadkow wobradźeja ratarjam tuchwilu wulke wjeselo. „Wšitko běži po planje. Zastatk něhdźe połdra tydźenja móžachmy w běhu jenož někotrych dnjow nachwatać“, rozprawja jednaćel Wulkowjelkowskich agrarnych wudźěłkow Ronny Döke na naprašowanje. W minjenych lětach běchu ratarjo po jeho słowach trochu zapleńčeni a móžachu hnydom spočatk nalěća swoje pola wobdźěłać. Tole njebě lětsa hladajo na zymny měrc móžno. Apryl je nětko ćim lěpši. Wonkowne wuměnjenja kaž wjedro, wobstejnosće pódy a klima su so pozitiwnje wuskutkowali, tak zo móžachu ratarjo wokoło Wulkeho Wjelkowa a Radworja tele dny ječmjeń, wows, cokorowu rěpu a žonop, na přikład za Małowjelkowski zawod Develey, wusywać. „Zdobom sćěhuje přichodne dny hišće kukurica. To hraje nam wjedro woprawdźe do kartow“, jednaćel wuswětla. Tohorunja móžachu swoje hona optimalnje hnojić. Nětko přeje sej Ronny Döke mnoho słónca a dale temperatury wokoło 20 stopjenjow.