Agrarna politika měła ratarjow do rozsudow zapřijeć
Lejno (SN/BŠe). Ratarjo steja stajnje zaso před nowymi wužadanjemi. Tole pokazowaše so wčera tež na informaciskim zarjadowanju regionalneho burskeho zwjazka Budyšin-Kamjenc w Lejnje, hdźež zaběrachu so přitomni z wodoprawniskimi rozsudami w zwisku ze škódnymi maćiznami. Litanija hižo wobstejacych zawjazkow we wobłuku tak mjenowaneje Cross-Compliance Europskeje unije je hoberska. Zawjazki pak maja ratarjo dodźeržeć, chcedźa-li direktnje spěchowanske srědki EU měć. Standardy su jara wysoke. Hač so zawody po nich maja, zamołwići jara dokładnje kontroluja.
