LEAG chce pohórnistwowy přirodoškitny areal hač do lěta 2024 zapławić
Běła Woda (SN/at). Za sobu najnaročniši projekt nastupajo rekultiwaciju pohórnistwowych płonin Wochožanskeje brunicoweje jamy su minjeny pjatk wažny nowy wotrězk zahajili. Zhorjelski krajny rada Bernd Lange (CDU) a Uwe Grosser, za hórnistwo zamołwity čłon zhromadneho předsydstwa Łužiska energija hórnistwo AG a Łužiska energija milinarnje AG (LEAG), staj na kromje přichodneho Kutowskeho jězora (Hermannsdorfer See) za jeho zapławjenje wulki wentil wotwjerćałoj.
Uwe Grosser rěčeše „wo prěnim přirodoškitnym jězoru, kotryž w zamołwitosći našeho hórnistwoweho předewzaća nastanje. A to, hdyž we Wochožanskej jamje brunicu dale wudobywamy.“ „Hinak hač hišće před 30 lětami wróćimy regionej po intensiwnym wužiwanju krajinu ze šansu na přirodźe bliske wuwiće“, wuzběhny krajny rada Bernd Lange.
