Budyšin/Zły Komorow (SN/BŠe). Wu­dobywanje a zmilinjenje brunicy potrjechi tež serbski sydlenski rum w Sakskej a Braniborskej. Diskusije wo přichodźe Łužicy su tuž wulka problematika, z čimž ma so tež Zwjazk Łužiskich Serbow Domowina zaběrać, wšako dyrbja tež Serbja stejišćo zabrać a swoje předstawy a wočakowanja zaměrnje zastupować. Zo móhli zajimy wšitkich ludźi w Hornjej a Delnjej Łužicy wobkedźbować, planuje Domo­wina zhromadnje z Dźěłarnju přichoda Łužicy konferencu wo strukturnym wuwiću z wida Serbow pod hesłom „Quo vadis, Łužica?“, kotruž přewjedźe 13. a 14. septembra takrjec w srjedźišću sydlenskeho ruma Serbow w Złym Komorowje. Braniborska techniska uniwersita Choćebuz-Zły Komorow poskići za konferencu trěbne rumnosće a wědu fachowcow.